球星爭位撻着認真Mode
世盃冠軍熱門之一嘅法國，決賽周前選擇留喺國內集訓，今場喺南特迎戰非洲勁旅科特迪瓦，雖然陣容不整，但法國勝在粒粒皆星，落場球員要搏盡爭取上陣機會，留力機會唔大。法國擅長壓迫性進攻，往往能夠先下手為強，今場博半場主勝好路。文:工廠仔
（Now 618周五凌晨3時10分直播）
法國今場有奧士文尼迪比利、威廉沙列巴等6個啱啱踢完歐聯決賽嘅國腳缺陣，不過領隊迪甘斯所挑選嘅26名球員，全部都能夠獨當一面，鋒線依然有基利安麥巴比、米高奧利斯、卓基等猛將領軍，對球隊進攻能力完全冇疑慮，而且班球員為爭取表演機會，必定會火力全開。
法國喺外圍賽輕鬆出線，6場賽事有4場喺上半場領先，今年兩場熱身賽對巴西同埋哥倫比亞，同樣喺上半場領先下由頭贏到尾，近3場賽事全開半場勝。法國首場分組賽會對塞內加爾，今場約戰同樣嚟自非洲嘅科特迪瓦，正係針對性演練，相信會認真備戰。
科特迪瓦戰績下滑
今場係科特迪瓦喺決賽周前唯一一場熱身賽，對法國之後就會飛美國備戰。呢支非洲名牌近年實力下滑，今年初喺非國盃8強出局，而且球員年紀偏細，面對身經百戰嘅法國難免怯場，作客會踢得更保守，法國有望圍攻格局搶先機，一於捧半場主勝。