今晚荷乙獨腳戲，阿積士青年隊主場鬥FC燕豪芬。阿積士青年隊連戰連敗，重攻輕守打法令失波數字高企；FC燕豪芬今季聯賽未輸過，今場遇上「冇骨魚腩」，客勝有計。（周二凌晨2時開賽）
阿積士青年隊防守堅曳
阿積士青年隊今季戰績勁曳，聯賽6仗只得1和5負未贏過，依家喺聯賽排緊包尾。由於荷甲班霸阿積士向來崇尚進攻，因此青年隊亦秉承傳統，但佢哋明顯攻守失衡，呢6場入咗10粒，喺下游嚟講絕對係數一數二，甚至多過中游球隊迪加史卓普、烏德勒支青年隊，可惜失波竟多達20球，單係近4仗，就有3場領先下被逼和或反輸，包括上仗對阿爾克馬爾反輸2比5，呢種有前冇後踢法，實在太過華而不實。
相反，FC燕豪芬雖然位處中下游，入得5粒亦唔叫突出，但佢哋勝在防守穩健僅失2球，開咧後5場聯賽錄2勝3和，係今季荷乙唯一不敗之師，同阿積士青年隊可謂截然不同。而且「阿青」志在為一隊練兵，唔太重視成績，連同上季在內，跨季近8仗聯賽只得1和7負，FC燕豪芬今仗有餐開。