澳職搶分戰布里斯班獅吼主場迎戰「1哥」西悉尼流浪者。布里斯班獅吼開局表現唔差，5戰3勝1和1負排第4，近4場3勝，亨利荷利累積攻入3球，腳風甚順，不過今場對手西悉尼流浪者表現更勝一籌，5戰3勝2和保持不敗高踞榜首，入10球僅失2球，踢法攻守兼備，受讓平半捧下盤。
（myTV SUPER周五下午4時45分直播）
布里斯班獅吼上季成績欠佳，看守教練尼克格連離任，改由50歲嘅羅斯艾萊斯接手，佢之前做過獅吼助教4年之久，熟悉球隊運作，又做過橫濱水手助教，今次重返澳職出任主教練，球隊當堂耳目一新，攻守表現都大幅提升，季前殺入澳足盃決賽，最終輸畀FC悉尼得亞軍，聯賽開局成績亦理想，暫居第4位，不過今個月初曾以2比5大敗於威靈頓鳳凰腳下，表現略嫌欠穩。
多點進攻防不勝防
西悉尼流浪者今季由魯丹領軍，交出上佳演出，5戰不敗之餘，最重要係防線表現穩定，僅在作客紐卡素噴射機失2球，其餘4場都能保持0失球，其硬淨防線今仗只要保持狀態，已可立於不敗之地，至於攻擊方面，該隊今季10個入球來自8位不同球員，前線多點開花令人防不勝防，受讓下盤抵玩。